Mar 12 | KhmKCB | STEP | ព្រះអង្គ ចាប់ផ្ដើម មានបន្ទូល ទៅ ពួកគេ ជា រឿងប្រៀបប្រដូច ថា ៖ «មាន បុរស ម្នាក់ ធ្វើ ចម្ការទំពាំងបាយជូរ មួយ ក៏ ព័ទ្ធ របង ជុំវិញ ជីក កន្លែង បញ្ជាន់ ផ្លែ សង់ ប៉ម មួយ រួច ប្រវាស់ ឲ្យពួក អ្នកចម្ការ ហើយ ក៏ ចេញ ដំណើរ ទៅ

Mark 12

រឿងប្រៀបប្រដូចអំពីអ្នកជួលចំការ

1 ព្រះអង្គចាប់ផ្ដើមមានបន្ទូលទៅពួកគេជារឿងប្រៀបប្រដូចថា៖ «មានបុរសម្នាក់ធ្វើចម្ការទំពាំងបាយជូរមួយក៏ព័ទ្ធរបងជុំវិញជីកកន្លែងបញ្ជាន់ផ្លែសង់ប៉មមួយរួចប្រវាស់ឲ្យពួកអ្នកចម្ការហើយក៏ចេញដំណើរទៅ 2 លុះដល់រដូវប្រមូលផលគាត់ក៏ចាត់បាវបម្រើម្នាក់ឲ្យទៅឯពួកអ្នកចម្ការដើម្បីទទួលយកផលពីចម្ការទំពាំងបាយជូរពីពួកគេ 3 ប៉ុន្ដែពួកគេបានចាប់បាវបម្រើនោះវាយហើយបណ្ដេញឲ្យទៅវិញទាំងដៃទទេ 4 ហើយគាត់ក៏ចាត់បាវបម្រើម្នាក់ទៀតឲ្យទៅឯពួកគេម្ដងទៀតតែពួកគេបានវាយក្បាលបាវនោះទាំងប្រមាថទៀតផង 5 គាត់ចាត់ម្នាក់ទៀតឲ្យទៅប៉ុន្ដែពួកគេបានសម្លាប់អ្នកនោះហើយបាវបម្រើផ្សេងទៀតជាច្រើនខ្លះត្រូវគេវាយដំនិងខ្លះទៀតត្រូវគេសម្លាប់ 6 គាត់នៅមានកូនប្រុសជាទីស្រលាញ់ម្នាក់ទៀតនៅទីបំផុតគាត់ក៏ចាត់កូននោះឲ្យទៅឯពួកគេដោយនិយាយថាពួកគេនឹងគោរពកូនប្រុសរបស់ខ្ញុំ 7 ប៉ុន្ដែអ្នកចម្ការទាំងនោះបាននិយាយគ្នាថាម្នាក់នេះជាអ្នកស្នងមរតកចូរយើងសម្លាប់វាចោលទៅនោះមរតកទាំងអស់នឹងត្រលប់ជារបស់យើងហើយ 8 រួចពួកគេក៏ចាប់គាត់សម្លាប់ហើយបោះទៅក្រៅចម្ការទំពាំងបាយជូរ។ 9 ដូច្នេះតើម្ចាស់ចម្ការទំពាំងបាយជូរនឹងធ្វើយ៉ាងដូចម្ដេច? គាត់នឹងមកសម្លាប់ពួកអ្នកចម្ការហើយប្រគល់ចម្ការនោះឲ្យទៅអ្នកផ្សេងទៀត។ 10 តើអ្នករាល់គ្នាមិនដែលអានបទគម្ពីរទេឬអីថាថ្មដែលជាងសំណង់បោះបង់ចោលបានត្រលប់ជាថ្មដ៏សំខាន់នៅតាមជ្រុង 11 ការនេះកើតឡើងពីព្រះអម្ចាស់ហើយអស្ចារ្យណាស់នៅចំពោះភ្នែកយើង»។ 12 ពួកគេរកចាប់ព្រះអង្គព្រោះពួកគេដឹងថាព្រះអង្គមានបន្ទូលជារឿងប្រៀបប្រដូចនោះគឺសំដៅលើពួកគេប៉ុន្ដែពួកគេខ្លាចបណ្ដាជនហើយក៏ចេញពីព្រះអង្គទៅ។

ការបង់ពន្ធអោយព្រះចៅសេសារ

13 រួចពួកគេចាត់ពួកអ្នកខាងគណៈផារិស៊ីនិងពួកអ្នកខាងគណៈហេរ៉ូឌខ្លះឲ្យទៅឯព្រះអង្គដើម្បីចាប់កំហុសពេលព្រះអង្គមានបន្ទូល 14 ពេលមកដល់ពួកគេសួរព្រះអង្គថា៖ «លោកគ្រូយើងដឹងថាលោកពិតត្រង់លោកមិនខ្វល់ពីអ្នកណាទេព្រោះលោកមិនយោគយល់មុខមនុស្សឡើយផ្ទុយទៅវិញលោកបង្រៀនពីផ្លូវរបស់ព្រះជាម្ចាស់ទៅតាមសេចក្ដីពិត។ ដូច្នេះតើការបង់ពន្ធឲ្យព្រះចៅអធិរាជនោះតឹ្រមត្រូវតាមវិន័យដែរឬទេ? តើយើងគួរបង់ឬក៏មិនគួរបង់?» 15 ព្រះអង្គជ្រាបពីពុតត្បុតពួកគេក៏មានបន្ទូលទៅពួកគេថា៖ «ហេតុអ្វីបានជាអ្នករាល់គ្នាល្បងលខ្ញុំដូច្នេះ? ចូរយកប្រាក់មួយឌេណារីឲ្យខ្ញុំ» 16 គេក៏យកកាក់មួយឲ្យទៅព្រះអង្គរួចព្រះអង្គសួរពួកគេថា៖ «តើរូបនិងចំណារលើកាក់នេះជារបស់នរណា?» ពួកគេទូលព្រះអង្គថា៖ «ជារបស់ព្រះចៅអធិរាជ» 17 ព្រះយេស៊ូមានបន្ទូលទៅពួកគេថា៖ «ចូរឲ្យអ្វីៗដែលជារបស់ព្រះចៅអធិរាជដល់ព្រះចៅអធិរាជហើយថ្វាយអ្វីៗដែលជារបស់ព្រះជាម្ចាស់ដល់ព្រះជាម្ចាស់ចុះ» ពួកគេក៏នឹកអស្ចារ្យនឹងព្រះអង្គ។

អាពាហ៍ពិពាហ៍នៅពេលរស់ឡើងវិញ

18 ឯពួកអ្នកខាងគណៈសាឌូស៊ីដែលនិយាយថាគ្មានការរស់ឡើងវិញបានមកឯព្រះអង្គហើយសួរព្រះអង្គថា៖ 19 «លោកគ្រូលោកម៉ូសេបានសរសេរទុកសម្រាប់យើងថាប្រសិនបើបងប្រុសរបស់អ្នកណាម្នាក់ស្លាប់ចោលប្រពន្ធដោយមិនទាន់មានកូនប្អូនប្រុសអ្នកស្លាប់នោះត្រូវយកប្រពន្ធរបស់បងហើយបង្កើតកូនឲ្យបងប្រុសរបស់គាត់។ 20 មានបងប្អូនប្រុសប្រាំពីរនាក់បងប្រុសច្បងបានយកប្រពន្ធហើយក៏ស្លាប់ទៅដោយមិនទាន់មានកូន 21 ប្អូនប្រុសទីពីរបានយកនាងរួចក៏ស្លាប់ទៀតដោយមិនទាន់មានកូនឯប្អូនប្រុសទីបីក៏ដូចគ្នាដែរ 22 បងប្អូនប្រុសទាំងប្រាំពីរនាក់មិនបានមានកូនទេទីបំផុតស្ដ្រីនោះក៏ស្លាប់ដែរ 23 ចុះពេលពួកគេរស់ឡើងវិញតើនាងជាប្រពន្ធរបស់អ្នកណាក្នុងចំណោមពួកគេ? ព្រោះបងប្អូនប្រុសទាំងប្រាំពីរនាក់បានយកនាងធ្វើជាប្រពន្ធគ្រប់គ្នា 24 ព្រះយេស៊ូមានបន្ទូលទៅពួកគេថា៖ «អ្នករាល់គ្នាមិនយល់បទគម្ពីរនិងអំណាចរបស់ព្រះជាម្ចាស់ទេតើនេះមិនមែនជាហេតុផលដែលអ្នករាល់គ្នាយល់ច្រឡំទេឬ? 25 ព្រោះពេលមនុស្សស្លាប់រស់ឡើងវិញគេមិនរៀបការជាប្ដីប្រពន្ធទៀតឡើយប៉ុន្ដែពួកគេដូចជាពួកទេវតានៅស្ថានសួគ៌វិញ 26 តើអ្នករាល់គ្នាមិនបានអានអំពីមនុស្សស្លាប់រស់ឡើងវិញនៅក្នុងគម្ពីរលោកម៉ូសេទេឬអីគឺនៅត្រង់គុម្ពបន្លាដែលព្រះជាម្ចាស់មានបន្ទូលទៅលោកថាយើងជាព្រះរបស់អ័ប្រាហាំជាព្រះរបស់អ៊ីសាកនិងជាព្រះរបស់យ៉ាកុប? 27 ព្រះអង្គមិនមែនជាព្រះរបស់មនុស្សស្លាប់ទេប៉ុន្ដែជាព្រះរបស់មនុស្សរស់អ្នករាល់គ្នាយល់ច្រឡំធំណាស់»។

បញ្ញតិ្តធំជាងគេបំផុត

28 គ្រូវិន័យម្នាក់បានចូលមកជិតនិងឮពួកគេជជែកគ្នាហើយដឹងថាព្រះអង្គឆ្លើយនឹងពួកគេបានល្អក៏សួរព្រះអង្គថា៖ «តើនៅក្នុងចំណោមបញ្ញត្ដិទាំងអស់បញ្ញត្ដិទីមួយគឺអ្វី?» 29 ព្រះយេស៊ូមានបន្ទូលឆ្លើយថា៖ «បញ្ញត្ដិទីមួយគឺចូរស្ដាប់ចុះអ៊ីស្រាអែលអើយព្រះអម្ចាស់ជាព្រះរបស់យើងជាព្រះអម្ចាស់តែមួយគត់ 30 អ្នកត្រូវស្រលាញ់ព្រះអម្ចាស់ជាព្រះរបស់អ្នកឲ្យអស់ពីចិត្ដអស់ពីគំនិតអស់ពីព្រលឹងនិងអស់ពីកម្លាំងអ្នក 31 រីឯបញ្ញត្ដិទីពីរគឺអ្នកត្រូវស្រលាញ់អ្នកជិតខាងរបស់អ្នកឲ្យដូចជាខ្លួនអ្នកគ្មានបញ្ញត្ដិណាធំជាងបញ្ញត្ដិទាំងពីរនេះទៀតទេ» 32 គ្រូវិន័យនោះទូលព្រះអង្គថា៖ «លោកគ្រូជាការពិតនិងត្រឹមត្រូវណាស់ដែលលោកនិយាយថាព្រះជាម្ចាស់មានតែមួយអង្គគត់ហើយគ្មានព្រះឯណាទៀតក្រៅពីព្រះអង្គឡើយ 33 ហើយឲ្យស្រលាញ់ព្រះអង្គអស់ពីចិត្ដអស់ពីប្រាជ្ញាអស់ពីព្រលឹងនិងអស់ពីកម្លាំងនិងឲ្យស្រលាញ់អ្នកជិតខាងឲ្យដូចជាខ្លួនឯងនោះប្រសើរជាងតង្វាយដុតនិងយញ្ញបូជាទាំងអស់ទៅទៀត»។ 34 កាលព្រះយេស៊ូឃើញគាត់ឆ្លើយយ៉ាងឈ្លាសវៃដូច្នេះព្រះអង្គក៏មានបន្ទូលទៅគាត់ថា៖ «អ្នកនៅមិនឆ្ងាយពីនគរព្រះជាម្ចាស់ទេ» រួចគ្មាននរណាហ៊ានសួរសំណួរព្រះអង្គទៀតទេ។

តើព្រះគ្រិស្ដជាបុត្ររបស់អ្នកណា?

35 ព្រះយេស៊ូមានបន្ទូលនៅពេលបង្រៀននៅក្នុងព្រះវិហារថា៖ «តើហេតុដូចម្ដេចបានជាពួកគ្រូវិន័យនិយាយថាព្រះគ្រិស្ដជាពូជពង្សដាវីឌដូច្នេះ? 36 ព្រោះដាវីឌផ្ទាល់បាននិយាយដោយព្រះវិញ្ញាណបរិសុទ្ធថាព្រះអម្ចាស់បានមានបន្ទូលមកកាន់ព្រះអម្ចាស់របស់ខ្ញុំថាចូរអង្គុយនៅខាងស្ដាំយើងរហូតដល់យើងដាក់ខ្មាំងសត្រូវរបស់អ្នកនៅក្រោមជើងរបស់អ្នក 37 ដូច្នេះបើដាវីឌហៅព្រះអង្គថាជាព្រះអម្ចាស់នោះព្រះអង្គជាពូជពង្សដាវីឌយ៉ាងដូចម្ដេច?» មនុស្សច្រើនកុះករបានស្ដាប់ព្រះអង្គដោយសប្បាយរីករាយ 38 ហើយក្នុងសេចក្ដីបង្រៀននោះព្រះអង្គមានបន្ទូលថា៖ «ចូរប្រយ័ត្ននឹងពួកគ្រូវិន័យដែលចូលចិត្ដពាក់អាវវែងដើរចុះដើរឡើងឲ្យគេគោរពនៅតាមទីប្រជុំជន 39 ហើយចូលចិត្ដអង្គុយមុខគេក្នុងសាលាប្រជុំព្រមទាំងនៅកន្លែងកិត្ដិយសក្នុងពិធីជប់លៀង 40 ពួកគេបំផ្លាញទ្រព្យសម្បត្ដិរបស់ស្ដ្រីមេម៉ាយហើយធ្វើពុតអធិស្ឋានយ៉ាងយូរ។ អ្នកទាំងនោះនឹងទទួលទោសធ្ងន់ធ្ងរជាងគេ»។

តង្វាយរបស់ស្ត្រីមេម៉ាយ

41 ពេលព្រះយេស៊ូអង្គុយនៅទល់មុខហិបតង្វាយនិងមើលរបៀបដែលបណ្ដាជនដាក់កាក់ទៅក្នុងហិបតង្វាយហើយមានអ្នកមានជាច្រើនបានដាក់កាក់យ៉ាងច្រើនចូលទៅក្នុងនោះ 42 ហើយមានស្ដ្រីមេម៉ាយក្រីក្រម្នាក់មកដល់គាត់បានដាក់កាក់តែពីរឡិបតាដែលស្មើនឹងមួយកូដ្រានប៉ុណ្ណោះ 43 ព្រះយេស៊ូហៅពួកសិស្សរបស់ព្រះអង្គមកនិងមានបន្ទូលទៅគេថា៖ «ខ្ញុំប្រាប់អ្នករាល់គ្នាជាប្រាកដថាស្ដ្រីមេម៉ាយក្រីក្រម្នាក់នេះបានដាក់តង្វាយច្រើនជាងអ្នកទាំងអស់ដែលបានដាក់តង្វាយក្នុងហិបតង្វាយនេះទៅទៀត 44 ព្រោះមនុស្សគ្រប់គ្នាដាក់តង្វាយពីសំណល់របស់ពួកគេប៉ុន្ដែស្ដ្រីម្នាក់នេះទោះបើនាងក្រីក្រយ៉ាងណានាងបានថ្វាយអ្វីៗទាំងអស់ដែលនាងមានផង»។

Mark 12

រឿង​ប្រៀប​ប្រដូច​អំពី​អ្នក​ជួល​ចំការ​

ការ​បង់​ពន្ធ​អោយព្រះ​ចៅ​សេសារ​

អា​ពា​ហ៍​ពិ​ពា​ហ៍​នៅពេល​រស់​ឡើង​វិញ

បញ្ញតិ្ត​ធំជាងគេ​បំផុត​

តើ​ព្រះ​គ្រិស្ដ​ជា​បុត្រ​របស់​អ្នក​ណា​?